Was isch e Basler? E Humanischt, e Schpötter, e Musefründ, e Chemiearbaiter? All das und no viil mee findet me in Basel uff Schritt und Tritt. Aber dr woori Basler und die woori Baslere erkennt me an dr Liebi zem griene Ryy, zue unserer Stadt und unserer Faasnacht. Me erkennt sy am dief-luft-hoole, wenn sy mit dr Fääry dr Ryy iberquere, am Lüüchte vo de Auge, wenn sy uff s Minschter, Roothuus oder Spaaledoor luege, und am Härzglopfe, wenn’s amme Mäntig frie Vieri schloot und durch die verdungglede Gasse s Kommando: «Morgestraich, vorwärts marsch!» erschallt.

Unseri Faasnacht spiegled dr basler Gaischt wider und isch in synere Art unverwäggselbar und ainzigartig… ebbe wie dr Basler. D Basler Faasnacht fallt scho dorum uss em Raame, well sy ai bis zwai Wuche nach alle andere „Karneval’s- und Fasnachtsfeschter“ stattfindet. No sterker hebt sy sich aber doodurch ab, dass Vieles e beachtlig hochs künstlerisch’s Niveau zaigt: die riisige gmoolte Latäärne, d Laarve und d Koschtüüm vo de Faasnachtszüüg, die graimte gaischtryyche Zeedel, die sprüzzig pointierte Schnitzelbängg, vor allem aber die gekonnte Kläng vo de Piccolo und de Drummle. Die Traditione z pflääge und dää Gaischt wyterzgää, hänn uns drzue bewooge, en aigeni, glaini Clique z grinde.

Im Joor 1983, genau am 3. April 1983, hänn sich am Zunftaggerrain in Prattele 8 Fründe zämmegraufft und d Clique «d Luftschnapperli» ins Lääbe gruefe. Rüggwirkend ka me saage, s isch e tolle Entschaid gsi, denn mit ganz weenige Ussnaame hämmer durchwäggs positivi Erlääbnis und Erfaarige dörfe frööne. Erwääne mecht ych doo unser beliebt’s Schnapplüftli, unseri Clique-Zittig wo zwai Mool pro Joor farbig und in Baseldytsch duet erschyyne, unsere 2004-2005 umbaute Clique-Käller im Gundeli und au im 2005 unsere aigene Uffdritt im Internett. Näbbscht mittlerwyyle 15 Aggtive (5 Vordrääbler, 8 Pfyffer und e Major) khööre zer Zytt au 2 Eeremitgliider und öbbe 120 Gönner zue däm Verain. Unser Ziel isch es aber nit … immer mee und immer besser … nai mir möchte blyybe wie mir sinn und s aifach glatt ha mitenand.

Dää zämmegschnurpfddi Überbligg, wo kai Aaspruch uff Vollständigkait stellt, wäär erscht denn komplett, wenn alli fir dr Verain in irgendere Form täätige Persoone gnannt wurde. Uss verständlige Gründ isch das aber (laider) nit meeglig. Dääne allne aber an däre Stell härzlig z dangge möcht ych nit süüme. Bsunders dangge möcht ych aber allne Aggtive fir die glaischteti, nit immer aagnäämi Arbet. Es isch vor allem unsere Verdienscht, dass es uns scho esoo lang … und hoffendligg au no viil lenger git.

Allne Luftschnapperli wünsch ych fir d‘ Zuekunft alles erdängglig Gueti.
Eyre Obmaa

Alli Schnapplüftli uf ai Bligg

Do kenne dir in de alte Schnapplüftli wider emol e Bligg iinewärfe und Gschichte iber d’Luftschnapperli und de jewyilige Aggtividäte nocheläse.

d Basler Faasnacht vo de näggschte 15 Joor

Obmaa
Marco Bachmann
In den Schorenmatten 202
4058 Basel

Telefon G: 061 336 67 96
Natel: 078 637 10 80
E-Mail: marco.bachmann@cpvcap.ch